vb7:0.1Vibhaṅga
vb7:0.2Satipaṭṭhānavibhaṅga
vb7:1.01. Suttantabhājanīya
vb7:1.1Cattāro satipaṭṭhānā—
vb7:1.2idha bhikkhu ajjhattaṁ kāye kāyānupassī viharati bahiddhā kāye kāyānupassī viharati ajjhattabahiddhā kāye kāyānupassī viharati ātāpī sampajāno satimā vineyya loke abhijjhādomanassaṁ, ajjhattaṁ vedanāsu vedanānupassī viharati bahiddhā vedanāsu vedanānupassī viharati ajjhattabahiddhā vedanāsu vedanānupassī viharati ātāpī sampajāno satimā vineyya loke abhijjhādomanassaṁ, ajjhattaṁ citte cittānupassī viharati bahiddhā citte cittānupassī viharati ajjhattabahiddhā citte cittānupassī viharati ātāpī sampajāno satimā vineyya loke abhijjhādomanassaṁ, ajjhattaṁ dhammesu dhammānupassī viharati bahiddhā dhammesu dhammānupassī viharati ajjhattabahiddhā dhammesu dhammānupassī viharati ātāpī sampajāno satimā vineyya loke abhijjhādomanassaṁ.
vb7:2.01.1. Kāyānupassanāniddesa
vb7:2.1Kathañca bhikkhu ajjhattaṁ kāye kāyānupassī viharati?
vb7:2.2Idha bhikkhu ajjhattaṁ kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati—
vb7:2.3“atthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan”ti.
vb7:2.4So taṁ nimittaṁ āsevati bhāveti bahulīkaroti, svāvatthitaṁ vavatthapeti.
vb7:2.5So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā kāye cittaṁ upasaṁharati.
vb7:3.1Kathañca bhikkhu bahiddhā kāye kāyānupassī viharati?
vb7:3.2Idha bhikkhu bahiddhā kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati—
vb7:3.3“atthissa kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan”ti.
vb7:3.4So taṁ nimittaṁ āsevati bhāveti bahulīkaroti, svāvatthitaṁ vavatthapeti.
vb7:3.5So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā kāye cittaṁ upasaṁharati.
vb7:4.1Kathañca bhikkhu ajjhattabahiddhā kāye kāyānupassī viharati?
vb7:4.2Idha bhikkhu ajjhattabahiddhā kāyaṁ uddhaṁ pādatalā adho kesamatthakā tacapariyantaṁ pūraṁ nānappakārassa asucino paccavekkhati—
vb7:4.3“atthi imasmiṁ kāye kesā lomā nakhā dantā taco, maṁsaṁ nhāru aṭṭhi aṭṭhimiñjaṁ vakkaṁ, hadayaṁ yakanaṁ kilomakaṁ pihakaṁ papphāsaṁ, antaṁ antaguṇaṁ udariyaṁ karīsaṁ, pittaṁ semhaṁ pubbo lohitaṁ sedo medo, assu vasā kheḷo siṅghāṇikā lasikā muttan”ti.
vb7:4.4Evaṁ bhikkhu ajjhattabahiddhā kāye kāyānupassī viharati ātāpī sampajāno satimā vineyya loke abhijjhādomanassaṁ.
vb7:5.1“Anupassī”ti.
vb7:5.2Tattha katamā anupassanā?
vb7:5.3Yā paññā pajānanā …pe… amoho dhammavicayo sammādiṭṭhi—
vb7:5.4ayaṁ vuccati “anupassanā”.
vb7:5.5Imāya anupassanāya upeto hoti samupeto upāgato samupāgato upapanno sampanno samannāgato.
vb7:5.6Tena vuccati “anupassī”ti.
vb7:6.1“Viharatī”ti.
vb7:6.2Iriyati vattati pāleti yapeti yāpeti carati viharati.
vb7:6.3Tena vuccati “viharatī”ti.
vb7:7.1“Ātāpī”ti.
vb7:7.2Tattha katamo ātāpo?
vb7:7.3Yo cetasiko vīriyārambho …pe… sammāvāyāmo—
vb7:7.4ayaṁ vuccati “ātāpo”.
vb7:7.5Iminā ātāpena upeto hoti samupeto upāgato samupāgato upapanno sampanno samannāgato.
vb7:7.6Tena vuccati “ātāpī”ti.
vb7:8.1“Sampajāno”ti.
vb7:8.2Tattha katamaṁ sampajaññaṁ?
vb7:8.3Yā paññā pajānanā …pe… amoho dhammavicayo sammādiṭṭhi—
vb7:8.4idaṁ vuccati “sampajaññaṁ”.
vb7:8.5Iminā sampajaññena upeto hoti samupeto upāgato samupāgato upapanno sampanno samannāgato.
vb7:8.6Tena vuccati “sampajāno”ti.
vb7:9.1“Satimā”ti.
vb7:9.2Tattha katamā sati?
vb7:9.3Yā sati anussati …pe… sammāsati—
vb7:9.4ayaṁ vuccati “sati”.
vb7:9.5Imāya satiyā upeto hoti samupeto upāgato samupāgato upapanno sampanno samannāgato.
vb7:9.6Tena vuccati “satimā”ti.
vb7:10.1“Vineyya loke abhijjhādomanassan”ti.
vb7:10.2Tattha katamo loko?
vb7:10.3Sveva kāyo loko.
vb7:10.4Pañcapi upādānakkhandhā loko.
vb7:10.5Ayaṁ vuccati “loko”.
vb7:10.6Tattha katamā abhijjhā?
vb7:10.7Yo rāgo sārāgo …pe… cittassa sārāgo—
vb7:10.8ayaṁ vuccati “abhijjhā”.
vb7:10.9Tattha katamaṁ domanassaṁ?
vb7:10.10Yaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—
vb7:10.11idaṁ vuccati “domanassaṁ”.
vb7:10.12Iti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.
vb7:10.13Tena vuccati “vineyya loke abhijjhādomanassan”ti.
vb7:11.1Kāyānupassanāniddeso.
vb7:12.01.2. Vedanānupassanāniddesa
vb7:12.1Kathañca bhikkhu ajjhattaṁ vedanāsu vedanānupassī viharati?
vb7:12.2Idha bhikkhu sukhaṁ vedanaṁ vedayamāno “sukhaṁ vedanaṁ vedayāmī”ti pajānāti, dukkhaṁ vedanaṁ vedayamāno “dukkhaṁ vedanaṁ vedayāmī”ti pajānāti, adukkhamasukhaṁ vedanaṁ vedayamāno “adukkhamasukhaṁ vedanaṁ vedayāmī”ti pajānāti, sāmisaṁ vā sukhaṁ vedanaṁ vedayamāno “sāmisaṁ sukhaṁ vedanaṁ vedayāmī”ti pajānāti, nirāmisaṁ vā sukhaṁ vedanaṁ vedayamāno “nirāmisaṁ sukhaṁ vedanaṁ vedayāmī”ti pajānāti, sāmisaṁ vā dukkhaṁ vedanaṁ vedayamāno “sāmisaṁ dukkhaṁ vedanaṁ vedayāmī”ti pajānāti, nirāmisaṁ vā dukkhaṁ vedanaṁ vedayamāno “nirāmisaṁ dukkhaṁ vedanaṁ vedayāmī”ti pajānāti, sāmisaṁ vā adukkhamasukhaṁ vedanaṁ vedayamāno “sāmisaṁ adukkhamasukhaṁ vedanaṁ vedayāmī”ti pajānāti, nirāmisaṁ vā adukkhamasukhaṁ vedanaṁ vedayamāno “nirāmisaṁ adukkhamasukhaṁ vedanaṁ vedayāmī”ti pajānāti.
vb7:12.3So taṁ nimittaṁ āsevati bhāveti bahulīkaroti svāvatthitaṁ vavatthapeti.
vb7:12.4So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā vedanāsu cittaṁ upasaṁharati.
vb7:13.1Kathañca bhikkhu bahiddhā vedanāsu vedanānupassī viharati?
vb7:13.2Idha bhikkhu sukhaṁ vedanaṁ vedayamānaṁ “sukhaṁ vedanaṁ vedayatī”ti pajānāti, dukkhaṁ vedanaṁ vedayamānaṁ “dukkhaṁ vedanaṁ vedayatī”ti pajānāti, adukkhamasukhaṁ vedanaṁ vedayamānaṁ “adukkhamasukhaṁ vedanaṁ vedayatī”ti pajānāti, sāmisaṁ vā sukhaṁ vedanaṁ vedayamānaṁ “sāmisaṁ sukhaṁ vedanaṁ vedayatī”ti pajānāti, nirāmisaṁ vā sukhaṁ vedanaṁ vedayamānaṁ “nirāmisaṁ sukhaṁ vedanaṁ vedayatī”ti pajānāti, sāmisaṁ vā dukkhaṁ vedanaṁ vedayamānaṁ “sāmisaṁ dukkhaṁ vedanaṁ vedayatī”ti pajānāti, nirāmisaṁ vā dukkhaṁ vedanaṁ vedayamānaṁ “nirāmisaṁ dukkhaṁ vedanaṁ vedayatī”ti pajānāti, sāmisaṁ vā adukkhamasukhaṁ vedanaṁ vedayamānaṁ “sāmisaṁ adukkhamasukhaṁ vedanaṁ vedayatī”ti pajānāti, nirāmisaṁ vā adukkhamasukhaṁ vedanaṁ vedayamānaṁ “nirāmisaṁ adukkhamasukhaṁ vedanaṁ vedayatī”ti pajānāti.
vb7:13.3So taṁ nimittaṁ āsevati bhāveti bahulīkaroti svāvatthitaṁ vavatthapeti.
vb7:13.4So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā vedanāsu cittaṁ upasaṁharati.
vb7:14.1Kathañca bhikkhu ajjhattabahiddhā vedanāsu vedanānupassī viharati?
vb7:14.2Idha bhikkhu sukhaṁ vedanaṁ “sukhā vedanā”ti pajānāti, dukkhaṁ vedanaṁ “dukkhā vedanā”ti pajānāti, adukkhamasukhaṁ vedanaṁ “adukkhamasukhā vedanā”ti pajānāti, sāmisaṁ vā sukhaṁ vedanaṁ “sāmisā sukhā vedanā”ti pajānāti, nirāmisaṁ vā sukhaṁ vedanaṁ “nirāmisā sukhā vedanā”ti pajānāti, sāmisaṁ vā dukkhaṁ vedanaṁ “sāmisā dukkhā vedanā”ti pajānāti, nirāmisaṁ vā dukkhaṁ vedanaṁ “nirāmisā dukkhā vedanā”ti pajānāti, sāmisaṁ vā adukkhamasukhaṁ vedanaṁ “sāmisā adukkhamasukhā vedanā”ti pajānāti, nirāmisaṁ vā adukkhamasukhaṁ vedanaṁ “nirāmisā adukkhamasukhā vedanā”ti pajānāti.
vb7:14.3Evaṁ bhikkhu ajjhattabahiddhā vedanāsu vedanānupassī viharati ātāpī sampajāno satimā vineyya loke abhijjhādomanassaṁ.
vb7:15.1“Anupassī”ti …pe…
vb7:15.2“viharatī”ti …pe…
vb7:15.3“ātāpī”ti …pe…
vb7:15.4“sampajāno”ti …pe…
vb7:15.5“satimā”ti …pe…
vb7:15.6“vineyya loke abhijjhādomanassan”ti.
vb7:15.7Tattha katamo loko?
vb7:15.8Sāyeva vedanā loko.
vb7:15.9Pañcapi upādānakkhandhā loko.
vb7:15.10Ayaṁ vuccati “loko”.
vb7:15.11Tattha katamā abhijjhā?
vb7:15.12Yo rāgo sārāgo …pe… cittassa sārāgo—
vb7:15.13ayaṁ vuccati “abhijjhā”.
vb7:15.14Tattha katamaṁ domanassaṁ?
vb7:15.15Yaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—
vb7:15.16idaṁ vuccati “domanassaṁ”.
vb7:15.17Iti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.
vb7:15.18Tena vuccati “vineyya loke abhijjhādomanassan”ti.
vb7:16.1Vedanānupassanāniddeso.
vb7:17.01.3. Cittānupassanāniddesa
vb7:17.1Kathañca bhikkhu ajjhattaṁ citte cittānupassī viharati?
vb7:17.2Idha bhikkhu sarāgaṁ vā cittaṁ “sarāgaṁ me cittan”ti pajānāti, vītarāgaṁ vā cittaṁ “vītarāgaṁ me cittan”ti pajānāti, sadosaṁ vā cittaṁ “sadosaṁ me cittan”ti pajānāti, vītadosaṁ vā cittaṁ “vītadosaṁ me cittan”ti pajānāti, samohaṁ vā cittaṁ “samohaṁ me cittan”ti pajānāti, vītamohaṁ vā cittaṁ “vītamohaṁ me cittan”ti pajānāti, saṅkhittaṁ vā cittaṁ “saṅkhittaṁ me cittan”ti pajānāti, vikkhittaṁ vā cittaṁ “vikkhittaṁ me cittan”ti pajānāti, mahaggataṁ vā cittaṁ “mahaggataṁ me cittan”ti pajānāti, amahaggataṁ vā cittaṁ “amahaggataṁ me cittan”ti pajānāti, sauttaraṁ vā cittaṁ “sauttaraṁ me cittan”ti pajānāti, anuttaraṁ vā cittaṁ “anuttaraṁ me cittan”ti pajānāti, samāhitaṁ vā cittaṁ “samāhitaṁ me cittan”ti pajānāti, asamāhitaṁ vā cittaṁ “asamāhitaṁ me cittan”ti pajānāti, vimuttaṁ vā cittaṁ “vimuttaṁ me cittan”ti pajānāti, avimuttaṁ vā cittaṁ “avimuttaṁ me cittan”ti pajānāti.
vb7:17.3So taṁ nimittaṁ āsevati bhāveti bahulīkaroti svāvatthitaṁ vavatthapeti.
vb7:17.4So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā citte cittaṁ upasaṁharati.
vb7:18.1Kathañca bhikkhu bahiddhā citte cittānupassī viharati?
vb7:18.2Idha bhikkhu sarāgaṁ vāssa cittaṁ “sarāgamassa cittan”ti pajānāti, vītarāgaṁ vāssa cittaṁ “vītarāgamassa cittan”ti pajānāti, sadosaṁ vāssa cittaṁ “sadosamassa cittan”ti pajānāti, vītadosaṁ vāssa cittaṁ “vītadosamassa cittan”ti pajānāti, samohaṁ vāssa cittaṁ “samohamassa cittan”ti pajānāti, vītamohaṁ vāssa cittaṁ “vītamohamassa cittan”ti pajānāti, saṅkhittaṁ vāssa cittaṁ “saṅkhittamassa cittan”ti pajānāti, vikkhittaṁ vāssa cittaṁ “vikkhittamassa cittan”ti pajānāti, mahaggataṁ vāssa cittaṁ “mahaggatamassa cittan”ti pajānāti, amahaggataṁ vāssa cittaṁ “amahaggatamassa cittan”ti pajānāti, sauttaraṁ vāssa cittaṁ “sauttaramassa cittan”ti pajānāti, anuttaraṁ vāssa cittaṁ “anuttaramassa cittan”ti pajānāti, samāhitaṁ vāssa cittaṁ “samāhitamassa cittan”ti pajānāti, asamāhitaṁ vāssa cittaṁ “asamāhitamassa cittan”ti pajānāti, vimuttaṁ vāssa cittaṁ “vimuttamassa cittan”ti pajānāti, avimuttaṁ vāssa cittaṁ “avimuttamassa cittan”ti pajānāti.
vb7:18.3So taṁ nimittaṁ āsevati bhāveti bahulīkaroti svāvatthitaṁ vavatthapeti.
vb7:18.4So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā citte cittaṁ upasaṁharati.
vb7:19.1Kathañca bhikkhu ajjhattabahiddhā citte cittānupassī viharati?
vb7:19.2Idha bhikkhu sarāgaṁ vā cittaṁ “sarāgaṁ cittan”ti pajānāti, vītarāgaṁ vā cittaṁ “vītarāgaṁ cittan”ti pajānāti, sadosaṁ vā cittaṁ “sadosaṁ cittan”ti pajānāti, vītadosaṁ vā cittaṁ “vītadosaṁ cittan”ti pajānāti, samohaṁ vā cittaṁ “samohaṁ cittan”ti pajānāti, vītamohaṁ vā cittaṁ “vītamohaṁ cittan”ti pajānāti, saṅkhittaṁ vā cittaṁ “saṅkhittaṁ cittan”ti pajānāti, vikkhittaṁ vā cittaṁ “vikkhittaṁ cittan”ti pajānāti, mahaggataṁ vā cittaṁ “mahaggataṁ cittan”ti pajānāti, amahaggataṁ vā cittaṁ “amahaggataṁ cittan”ti pajānāti, sauttaraṁ vā cittaṁ “sauttaraṁ cittan”ti pajānāti, anuttaraṁ vā cittaṁ “anuttaraṁ cittan”ti pajānāti, samāhitaṁ vā cittaṁ “samāhitaṁ cittan”ti pajānāti, asamāhitaṁ vā cittaṁ “asamāhitaṁ cittan”ti pajānāti, vimuttaṁ vā cittaṁ “vimuttaṁ cittan”ti pajānāti, avimuttaṁ vā cittaṁ “avimuttaṁ cittan”ti pajānāti.
vb7:19.3Evaṁ bhikkhu ajjhattabahiddhā citte cittānupassī viharati ātāpī sampajāno satimā vineyya loke abhijjhādomanassaṁ.
vb7:20.1“Anupassī”ti …pe…
vb7:20.2“viharatī”ti …pe…
vb7:20.3“ātāpī”ti …pe…
vb7:20.4“sampajāno”ti …pe…
vb7:20.5“satimā”ti …pe…
vb7:20.6“vineyya loke abhijjhādomanassan”ti.
vb7:20.7Tattha katamo loko?
vb7:20.8Taṁyeva cittaṁ loko.
vb7:20.9Pañcapi upādānakkhandhā loko.
vb7:20.10Tattha katamā abhijjhā?
vb7:20.11Yo rāgo sārāgo …pe… cittassa sārāgo—
vb7:20.12ayaṁ vuccati “abhijjhā”.
vb7:20.13Tattha katamaṁ domanassaṁ?
vb7:20.14Yaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—
vb7:20.15idaṁ vuccati “domanassaṁ”.
vb7:20.16Iti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.
vb7:20.17Tena vuccati “vineyya loke abhijjhādomanassan”ti.
vb7:21.1Cittānupassanāniddeso.
vb7:22.01.4. Dhammānupassanāniddesa
vb7:22.1Kathañca bhikkhu ajjhattaṁ dhammesu dhammānupassī viharati?
vb7:22.2Idha bhikkhu santaṁ vā ajjhattaṁ kāmacchandaṁ “atthi me ajjhattaṁ kāmacchando”ti pajānāti, asantaṁ vā ajjhattaṁ kāmacchandaṁ “natthi me ajjhattaṁ kāmacchando”ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṁ hoti tañca pajānāti, yathā ca pahīnassa kāmacchandassa āyatiṁ anuppādo hoti tañca pajānāti.
vb7:22.3Santaṁ vā ajjhattaṁ byāpādaṁ …pe…
vb7:22.4santaṁ vā ajjhattaṁ thinamiddhaṁ …pe…
vb7:22.5santaṁ vā ajjhattaṁ uddhaccakukkuccaṁ …pe…
vb7:22.6santaṁ vā ajjhattaṁ vicikicchaṁ “atthi me ajjhattaṁ vicikicchā”ti pajānāti, asantaṁ vā ajjhattaṁ vicikicchaṁ “natthi me ajjhattaṁ vicikicchā”ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṁ hoti tañca pajānāti, yathā ca pahīnāya vicikicchāya āyatiṁ anuppādo hoti tañca pajānāti.
vb7:23.1Santaṁ vā ajjhattaṁ satisambojjhaṅgaṁ “atthi me ajjhattaṁ satisambojjhaṅgo”ti pajānāti, asantaṁ vā ajjhattaṁ satisambojjhaṅgaṁ “natthi me ajjhattaṁ satisambojjhaṅgo”ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti, santaṁ vā ajjhattaṁ dhammavicayasambojjhaṅgaṁ …pe…
vb7:23.2santaṁ vā ajjhattaṁ vīriyasambojjhaṅgaṁ …pe…
vb7:23.3santaṁ vā ajjhattaṁ pītisambojjhaṅgaṁ …pe…
vb7:23.4santaṁ vā ajjhattaṁ passaddhisambojjhaṅgaṁ …pe…
vb7:23.5santaṁ vā ajjhattaṁ samādhisambojjhaṅgaṁ …pe…
vb7:23.6santaṁ vā ajjhattaṁ upekkhāsambojjhaṅgaṁ “atthi me ajjhattaṁ upekkhāsambojjhaṅgo”ti pajānāti, asantaṁ vā ajjhattaṁ upekkhāsambojjhaṅgaṁ “natthi me ajjhattaṁ upekkhāsambojjhaṅgo”ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti, tañca pajānāti.
vb7:23.7So taṁ nimittaṁ āsevati bhāveti bahulīkaroti, svāvatthitaṁ vavatthapeti.
vb7:23.8So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā bahiddhā dhammesu cittaṁ upasaṁharati.
vb7:24.1Kathañca bhikkhu bahiddhā dhammesu dhammānupassī viharati?
vb7:24.2Idha bhikkhu santaṁ vāssa kāmacchandaṁ “atthissa kāmacchando”ti pajānāti, asantaṁ vāssa kāmacchandaṁ “natthissa kāmacchando”ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṁ hoti tañca pajānāti, yathā ca pahīnassa kāmacchandassa āyatiṁ anuppādo hoti tañca pajānāti.
vb7:24.3Santaṁ vāssa byāpādaṁ …pe…
vb7:24.4santaṁ vāssa thinamiddhaṁ …pe…
vb7:24.5santaṁ vāssa uddhaccakukkuccaṁ …pe…
vb7:24.6santaṁ vāssa vicikicchaṁ “atthissa vicikicchā”ti pajānāti, asantaṁ vāssa vicikicchaṁ “natthissa vicikicchā”ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṁ hoti tañca pajānāti, yathā ca pahīnāya vicikicchāya āyatiṁ anuppādo hoti tañca pajānāti.
vb7:25.1Santaṁ vāssa satisambojjhaṅgaṁ “atthissa satisambojjhaṅgo”ti pajānāti, asantaṁ vāssa satisambojjhaṅgaṁ “natthissa satisambojjhaṅgo”ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti.
vb7:25.2Santaṁ vāssa dhammavicayasambojjhaṅgaṁ …pe…
vb7:25.3santaṁ vāssa vīriyasambojjhaṅgaṁ …pe…
vb7:25.4santaṁ vāssa pītisambojjhaṅgaṁ …pe…
vb7:25.5santaṁ vāssa passaddhisambojjhaṅgaṁ …pe…
vb7:25.6santaṁ vāssa samādhisambojjhaṅgaṁ …pe…
vb7:25.7santaṁ vāssa upekkhāsambojjhaṅgaṁ “atthissa upekkhāsambojjhaṅgo”ti pajānāti, asantaṁ vāssa upekkhāsambojjhaṅgaṁ “natthissa upekkhāsambojjhaṅgo”ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti tañca pajānāti.
vb7:25.8So taṁ nimittaṁ āsevati bhāveti bahulīkaroti, svāvatthitaṁ vavatthapeti.
vb7:25.9So taṁ nimittaṁ āsevitvā bhāvetvā bahulīkaritvā svāvatthitaṁ vavatthapetvā ajjhattabahiddhā dhammesu cittaṁ upasaṁharati.
vb7:26.1Kathañca bhikkhu ajjhattabahiddhā dhammesu dhammānupassī viharati?
vb7:26.2Idha bhikkhu santaṁ vā kāmacchandaṁ “atthi kāmacchando”ti pajānāti, asantaṁ vā kāmacchandaṁ “natthi kāmacchando”ti pajānāti, yathā ca anuppannassa kāmacchandassa uppādo hoti tañca pajānāti, yathā ca uppannassa kāmacchandassa pahānaṁ hoti tañca pajānāti, yathā ca pahīnassa kāmacchandassa āyatiṁ anuppādo hoti tañca pajānāti.
vb7:26.3Santaṁ vā byāpādaṁ …pe…
vb7:26.4santaṁ vā thinamiddhaṁ …pe…
vb7:26.5santaṁ vā uddhaccakukkuccaṁ …pe…
vb7:26.6santaṁ vā vicikicchaṁ “atthi vicikicchā”ti pajānāti, asantaṁ vā vicikicchaṁ “natthi vicikicchā”ti pajānāti, yathā ca anuppannāya vicikicchāya uppādo hoti tañca pajānāti, yathā ca uppannāya vicikicchāya pahānaṁ hoti tañca pajānāti, yathā ca pahīnāya vicikicchāya āyatiṁ anuppādo hoti tañca pajānāti.
vb7:27.1Santaṁ vā satisambojjhaṅgaṁ “atthi satisambojjhaṅgo”ti pajānāti, asantaṁ vā satisambojjhaṅgaṁ “natthi satisambojjhaṅgo”ti pajānāti, yathā ca anuppannassa satisambojjhaṅgassa uppādo hoti tañca pajānāti, yathā ca uppannassa satisambojjhaṅgassa bhāvanāya pāripūrī hoti tañca pajānāti.
vb7:27.2Santaṁ vā dhammavicayasambojjhaṅgaṁ …pe…
vb7:27.3santaṁ vā vīriyasambojjhaṅgaṁ …pe…
vb7:27.4santaṁ vā pītisambojjhaṅgaṁ …pe…
vb7:27.5santaṁ vā passaddhisambojjhaṅgaṁ …pe…
vb7:27.6santaṁ vā samādhisambojjhaṅgaṁ …pe…
vb7:27.7santaṁ vā upekkhāsambojjhaṅgaṁ “atthi upekkhāsambojjhaṅgo”ti pajānāti, asantaṁ vā upekkhāsambojjhaṅgaṁ “natthi upekkhāsambojjhaṅgo”ti pajānāti, yathā ca anuppannassa upekkhāsambojjhaṅgassa uppādo hoti tañca pajānāti, yathā ca uppannassa upekkhāsambojjhaṅgassa bhāvanāya pāripūrī hoti tañca pajānāti.
vb7:27.8Evaṁ bhikkhu ajjhattabahiddhā dhammesu dhammānupassī viharati ātāpī sampajāno satimā vineyya loke abhijjhādomanassaṁ.
vb7:28.1“Anupassī”ti.
vb7:28.2Tattha katamā anupassanā?
vb7:28.3Yā paññā pajānanā …pe… amoho dhammavicayo sammādiṭṭhi—
vb7:28.4ayaṁ vuccati “anupassanā”.
vb7:28.5Imāya anupassanāya upeto hoti samupeto upāgato samupāgato upapanno sampanno samannāgato.
vb7:28.6Tena vuccati “anupassī”ti.
vb7:29.1“Viharatī”ti.
vb7:29.2Iriyati vattati pāleti yapeti yāpeti carati viharati.
vb7:29.3Tena vuccati “viharatī”ti.
vb7:30.1“Ātāpī”ti.
vb7:30.2Tattha katamo ātāpo?
vb7:30.3Yo cetasiko vīriyārambho …pe… sammāvāyāmo—
vb7:30.4ayaṁ vuccati “ātāpo”.
vb7:30.5Iminā ātāpena upeto hoti …pe… samannāgato.
vb7:30.6Tena vuccati “ātāpī”ti.
vb7:31.1“Sampajāno”ti.
vb7:31.2Tattha katamaṁ sampajaññaṁ?
vb7:31.3Yā paññā pajānanā …pe… amoho dhammavicayo sammādiṭṭhi—
vb7:31.4idaṁ vuccati “sampajaññaṁ”.
vb7:31.5Iminā sampajaññena upeto hoti …pe… samannāgato.
vb7:31.6Tena vuccati “sampajāno”ti.
vb7:32.1“Satimā”ti.
vb7:32.2Tattha katamā sati?
vb7:32.3Yā sati anussati …pe… sammāsati—
vb7:32.4ayaṁ vuccati “sati”.
vb7:32.5Imāya satiyā upeto hoti …pe… samannāgato.
vb7:32.6Tena vuccati “satimā”ti.
vb7:33.1“Vineyya loke abhijjhādomanassan”ti.
vb7:33.2Tattha katamo loko?
vb7:33.3Teva dhammā loko.
vb7:33.4Pañcapi upādānakkhandhā loko.
vb7:33.5Ayaṁ vuccati “loko”.
vb7:33.6Tattha katamā abhijjhā?
vb7:33.7Yo rāgo sārāgo …pe… cittassa sārāgo—
vb7:33.8ayaṁ vuccati “abhijjhā”.
vb7:33.9Tattha katamaṁ domanassaṁ?
vb7:33.10Yaṁ cetasikaṁ asātaṁ cetasikaṁ dukkhaṁ cetosamphassajaṁ asātaṁ dukkhaṁ vedayitaṁ cetosamphassajā asātā dukkhā vedanā—
vb7:33.11idaṁ vuccati “domanassaṁ”.
vb7:33.12Iti ayañca abhijjhā idañca domanassaṁ imamhi loke vinītā honti paṭivinītā santā samitā vūpasantā atthaṅgatā abbhatthaṅgatā appitā byappitā sositā visositā byantīkatā.
vb7:33.13Tena vuccati “vineyya loke abhijjhādomanassan”ti.
vb7:34.1Dhammānupassanāniddeso.
vb7:34.2Suttantabhājanīyaṁ.
vb7:35.02. Abhidhammabhājanīya
vb7:35.1Cattāro satipaṭṭhānā—
vb7:35.2idha bhikkhu kāye kāyānupassī viharati, vedanāsu vedanānupassī viharati, citte cittānupassī viharati, dhammesu dhammānupassī viharati.
vb7:36.1Kathañca bhikkhu kāye kāyānupassī viharati?
vb7:36.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ kāye kāyānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:36.3idaṁ vuccati “satipaṭṭhānaṁ”.
vb7:36.4Avasesā dhammā satipaṭṭhānasampayuttā.
vb7:37.1Kathañca bhikkhu vedanāsu vedanānupassī viharati?
vb7:37.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ vedanāsu vedanānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:37.3idaṁ vuccati “satipaṭṭhānaṁ”.
vb7:37.4Avasesā dhammā satipaṭṭhānasampayuttā.
vb7:38.1Kathañca bhikkhu citte cittānupassī viharati?
vb7:38.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ citte cittānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:38.3idaṁ vuccati “satipaṭṭhānaṁ”.
vb7:38.4Avasesā dhammā satipaṭṭhānasampayuttā.
vb7:39.1Kathañca bhikkhu dhammesu dhammānupassī viharati?
vb7:39.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ dhammesu dhammānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:39.3idaṁ vuccati “satipaṭṭhānaṁ”.
vb7:39.4Avasesā dhammā satipaṭṭhānasampayuttā.
vb7:40.1Tattha katamaṁ satipaṭṭhānaṁ?
vb7:40.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ dhammesu dhammānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:40.3idaṁ vuccati “satipaṭṭhānaṁ”.
vb7:40.4Avasesā dhammā satipaṭṭhānasampayuttā.
vb7:41.1Cattāro satipaṭṭhānā—
vb7:41.2idha bhikkhu kāye kāyānupassī viharati, vedanāsu vedanānupassī viharati, citte cittānupassī viharati, dhammesu dhammānupassī viharati.
vb7:42.1Kathañca bhikkhu kāye kāyānupassī viharati?
vb7:42.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.
vb7:42.3Ime dhammā kusalā.
vb7:42.4Tasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ kāye kāyānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:42.5idaṁ vuccati “satipaṭṭhānaṁ”.
vb7:42.6Avasesā dhammā satipaṭṭhānasampayuttā.
vb7:43.1Kathañca bhikkhu vedanāsu vedanānupassī viharati?
vb7:43.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.
vb7:43.3Ime dhammā kusalā.
vb7:43.4Tasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ vedanāsu vedanānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:43.5idaṁ vuccati “satipaṭṭhānaṁ”.
vb7:43.6Avasesā dhammā satipaṭṭhānasampayuttā.
vb7:44.1Kathañca bhikkhu citte cittānupassī viharati?
vb7:44.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.
vb7:44.3Ime dhammā kusalā.
vb7:44.4Tasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ citte cittānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:44.5idaṁ vuccati “satipaṭṭhānaṁ”.
vb7:44.6Avasesā dhammā satipaṭṭhānasampayuttā.
vb7:45.1Kathañca bhikkhu dhammesu dhammānupassī viharati?
vb7:45.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.
vb7:45.3Ime dhammā kusalā.
vb7:45.4Tasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ dhammesu dhammānupassī, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:45.5idaṁ vuccati “satipaṭṭhānaṁ”.
vb7:45.6Avasesā dhammā satipaṭṭhānasampayuttā.
vb7:46.1Tattha katamaṁ satipaṭṭhānaṁ?
vb7:46.2Idha bhikkhu yasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti.
vb7:46.3Ime dhammā kusalā.
vb7:46.4Tasseva lokuttarassa kusalassa jhānassa katattā bhāvitattā vipākaṁ vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, yā tasmiṁ samaye sati anussati sammāsati satisambojjhaṅgo maggaṅgaṁ maggapariyāpannaṁ—
vb7:46.5idaṁ vuccati “satipaṭṭhānaṁ”.
vb7:46.6Avasesā dhammā satipaṭṭhānasampayuttā.
vb7:47.1Abhidhammabhājanīyaṁ.
vb7:48.03. Pañhāpucchaka
vb7:48.1Cattāro satipaṭṭhānā—
vb7:48.2idha bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ, vedanāsu vedanānupassī viharati ātāpī sampajāno satimā vineyya loke abhijjhādomanassaṁ, citte cittānupassī viharati ātāpī sampajāno satimā vineyya loke abhijjhādomanassaṁ, dhammesu dhammānupassī viharati ātāpī sampajāno satimā vineyya loke abhijjhādomanassaṁ.
vb7:49.1Catunnaṁ satipaṭṭhānānaṁ kati kusalā, kati akusalā, kati abyākatā …pe… kati saraṇā, kati araṇā?
vb7:50.03.1. Tika
vb7:50.1Siyā kusalā, siyā abyākatā …pe….
vb7:50.2Siyā sukhāya vedanāya sampayuttā, siyā adukkhamasukhāya vedanāya sampayuttā.
vb7:50.3Siyā vipākā siyā vipākadhammadhammā.
vb7:50.4Anupādinnaanupādāniyā.
vb7:50.5Asaṅkiliṭṭhaasaṅkilesikā.
vb7:50.6Siyā savitakkasavicārā, siyā avitakkavicāramattā, siyā avitakkaavicārā.
vb7:50.7Siyā pītisahagatā, siyā sukhasahagatā, siyā upekkhāsahagatā.
vb7:50.8Neva dassanena na bhāvanāya pahātabbā.
vb7:50.9Neva dassanena na bhāvanāya pahātabbahetukā.
vb7:50.10Siyā apacayagāmino, siyā nevācayagāmināpacayagāmino.
vb7:50.11Siyā sekkhā, siyā asekkhā.
vb7:50.12Appamāṇā.
vb7:50.13Appamāṇārammaṇā.
vb7:50.14Paṇītā.
vb7:50.15Siyā sammattaniyatā, siyā aniyatā.
vb7:50.16Na maggārammaṇā, siyā maggahetukā, siyā maggādhipatino, siyā na vattabbā “maggahetukā”tipi, “maggādhipatino”tipi.
vb7:50.17Siyā uppannā, siyā anuppannā, siyā uppādino.
vb7:50.18Siyā atītā, siyā anāgatā, siyā paccuppannā.
vb7:50.19Na vattabbā “atītārammaṇā”tipi, “anāgatārammaṇā”tipi, “paccuppannārammaṇā”tipi.
vb7:50.20Siyā ajjhattā, siyā bahiddhā, siyā ajjhattabahiddhā.
vb7:50.21Bahiddhārammaṇā.
vb7:50.22Anidassanaappaṭighā.
vb7:51.03.2. Duka
vb7:51.1Na hetū.
vb7:51.2Sahetukā.
vb7:51.3Hetusampayuttā.
vb7:51.4Na vattabbā hetū ceva sahetukā cāti, sahetukā ceva na ca hetū.
vb7:51.5Na vattabbā hetū ceva hetusampayuttā cāti, hetusampayuttā ceva na ca hetū.
vb7:51.6Na hetū sahetukā.
vb7:52.1Sappaccayā.
vb7:52.2Saṅkhatā.
vb7:52.3Anidassanā.
vb7:52.4Appaṭighā.
vb7:52.5Arūpā.
vb7:52.6Lokuttarā.
vb7:52.7Kenaci viññeyyā, kenaci na viññeyyā.
vb7:52.8No āsavā.
vb7:52.9Anāsavā.
vb7:52.10Āsavavippayuttā.
vb7:52.11Na vattabbā “āsavā ceva sāsavā cā”tipi, “sāsavā ceva no ca āsavā”tipi.
vb7:52.12Na vattabbā “āsavā ceva āsavasampayuttā cā”tipi, “āsavasampayuttā ceva no ca āsavā”tipi.
vb7:52.13Āsavavippayuttā.
vb7:52.14Anāsavā.
vb7:52.15No saṁyojanā …pe…
vb7:52.16no ganthā …pe…
vb7:52.17no oghā …pe…
vb7:52.18no yogā …pe…
vb7:52.19no nīvaraṇā …pe…
vb7:52.20no parāmāsā …pe…
vb7:52.21sārammaṇā.
vb7:52.22No cittā.
vb7:52.23Cetasikā.
vb7:52.24Cittasampayuttā.
vb7:52.25Cittasaṁsaṭṭhā.
vb7:52.26Cittasamuṭṭhānā.
vb7:52.27Cittasahabhuno.
vb7:52.28Cittānuparivattino.
vb7:52.29Cittasaṁsaṭṭhasamuṭṭhānā.
vb7:52.30Cittasaṁsaṭṭhasamuṭṭhānasahabhuno.
vb7:52.31Cittasaṁsaṭṭhasamuṭṭhānānuparivattino.
vb7:52.32Bāhirā.
vb7:52.33No upādā.
vb7:52.34Anupādinnā.
vb7:52.35No upādānā …pe…
vb7:52.36no kilesā …pe…
vb7:52.37na dassanena pahātabbā, na bhāvanāya pahātabbā.
vb7:52.38Na dassanena pahātabbahetukā.
vb7:52.39Na bhāvanāya pahātabbahetukā.
vb7:53.1Siyā savitakkā, siyā avitakkā.
vb7:53.2Siyā savicārā, siyā avicārā.
vb7:53.3Siyā sappītikā, siyā appītikā.
vb7:53.4Siyā pītisahagatā, siyā na pītisahagatā.
vb7:53.5Siyā sukhasahagatā, siyā na sukhasahagatā.
vb7:53.6Siyā upekkhāsahagatā, siyā na upekkhāsahagatā.
vb7:53.7Na kāmāvacarā.
vb7:53.8Na rūpāvacarā.
vb7:53.9Na arūpāvacarā.
vb7:53.10Apariyāpannā.
vb7:53.11Siyā niyyānikā, siyā aniyyānikā.
vb7:53.12Siyā niyatā, siyā aniyatā.
vb7:53.13Anuttarā.
vb7:53.14Araṇāti.
vb7:54.1Pañhāpucchakaṁ.
vb7:55.1Satipaṭṭhānavibhaṅgo niṭṭhito.