kv3.1:0.1Kathāvatthu
kv3.1:0.2Mahāpaṇṇāsaka
kv3.1:0.3Tatiyavagga
kv3.1:0.4Balakathā
kv3.1:1.1Tathāgatabalaṁ sāvakasādhāraṇanti?
kv3.1:1.2Āmantā.
kv3.1:1.3Tathāgatabalaṁ sāvakabalaṁ, sāvakabalaṁ tathāgatabalanti?
kv3.1:1.4Na hevaṁ vattabbe …pe…
kv3.1:2.1Tathāgatabalaṁ sāvakasādhāraṇanti?
kv3.1:2.2Āmantā.
kv3.1:2.3Taññeva tathāgatabalaṁ taṁ sāvakabalaṁ, taññeva sāvakabalaṁ taṁ tathāgatabalanti?
kv3.1:2.4Na hevaṁ vattabbe …pe….
kv3.1:3.1Tathāgatabalaṁ sāvakasādhāraṇanti?
kv3.1:3.2Āmantā.
kv3.1:3.3Yādisaṁ tathāgatabalaṁ tādisaṁ sāvakabalaṁ, yādisaṁ sāvakabalaṁ tādisaṁ tathāgatabalanti?
kv3.1:3.4Na hevaṁ vattabbe …pe….
kv3.1:4.1Tathāgatabalaṁ sāvakasādhāraṇanti?
kv3.1:4.2Āmantā.
kv3.1:4.3Yādiso tathāgatassa pubbayogo pubbacariyā dhammakkhānaṁ dhammadesanā tādiso sāvakassa pubbayogo pubbacariyā dhammakkhānaṁ dhammadesanāti?
kv3.1:4.4Na hevaṁ vattabbe …pe….
kv3.1:5.1Tathāgatabalaṁ sāvakasādhāraṇanti?
kv3.1:5.2Āmantā.
kv3.1:5.3Tathāgato jino satthā sammāsambuddho sabbaññū sabbadassāvī dhammassāmī dhammappaṭisaraṇoti?
kv3.1:5.4Āmantā.
kv3.1:5.5Sāvako jino satthā sammāsambuddho sabbaññū sabbadassāvī dhammassāmī dhammappaṭisaraṇoti?
kv3.1:5.6Na hevaṁ vattabbe …pe….
kv3.1:6.1Tathāgatabalaṁ sāvakasādhāraṇanti?
kv3.1:6.2Āmantā.
kv3.1:6.3Tathāgato anuppannassa maggassa uppādetā asañjātassa maggassa sañjanetā anakkhātassa maggassa akkhātā maggaññū maggavidū maggakovidoti?
kv3.1:6.4Āmantā.
kv3.1:6.5Sāvako anuppannassa maggassa uppādetā asañjātassa maggassa sañjanetā anakkhātassa maggassa akkhātā maggaññū maggavidū maggakovidoti?
kv3.1:6.6Na hevaṁ vattabbe …pe….
kv3.1:7.1Indriyaparopariyattaṁ yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:7.2Āmantā.
kv3.1:7.3Sāvako sabbaññū sabbadassāvīti?
kv3.1:7.4Na hevaṁ vattabbe …pe….
kv3.1:8.1Sāvako ṭhānāṭhānaṁ jānātīti?
kv3.1:8.2Āmantā.
kv3.1:8.3Hañci sāvako ṭhānāṭhānaṁ jānāti, tena vata re vattabbe—
kv3.1:8.4“ṭhānāṭhānaṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:9.1Sāvako atītānāgatapaccuppannānaṁ kammasamādānānaṁ ṭhānaso hetuso vipākaṁ jānātīti?
kv3.1:9.2Āmantā.
kv3.1:9.3Hañci sāvako atītānāgatapaccuppannānaṁ kammasamādānānaṁ ṭhānaso hetuso vipākaṁ jānāti, tena vata re vattabbe—
kv3.1:9.4“atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:10.1Sāvako sabbatthagāminiṁ paṭipadaṁ jānātīti?
kv3.1:10.2Āmantā.
kv3.1:10.3Hañci sāvako sabbatthagāminiṁ paṭipadaṁ jānāti, tena vata re vattabbe—
kv3.1:10.4“sabbatthagāminiṁ paṭipadaṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:11.1Sāvako anekadhātuṁ nānādhātuṁ lokaṁ jānātīti?
kv3.1:11.2Āmantā.
kv3.1:11.3Hañci sāvako anekadhātuṁ nānādhātuṁ lokaṁ jānāti, tena vata re vattabbe—
kv3.1:11.4“anekadhātuṁ nānādhātuṁ lokaṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:12.1Sāvako sattānaṁ nānādhimuttikataṁ jānātīti?
kv3.1:12.2Āmantā.
kv3.1:12.3Hañci sāvako sattānaṁ nānādhimuttikataṁ jānāti, tena vata re vattabbe—
kv3.1:12.4“sattānaṁ nānādhimuttikataṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:13.1Sāvako jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ jānātīti?
kv3.1:13.2Āmantā.
kv3.1:13.3Hañci sāvako jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ jānāti, tena vata re vattabbe—
kv3.1:13.4“jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:14.1Sāvako pubbenivāsānussatiṁ jānātīti?
kv3.1:14.2Āmantā.
kv3.1:14.3Hañci sāvako pubbenivāsānussatiṁ jānāti, tena vata re vattabbe—
kv3.1:14.4“pubbenivāsānussati yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:15.1Sāvako sattānaṁ cutūpapātaṁ jānātīti?
kv3.1:15.2Āmantā.
kv3.1:15.3Hañci sāvako sattānaṁ cutūpapātaṁ jānāti, tena vata re vattabbe—
kv3.1:15.4“sattānaṁ cutūpapātaṁ yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:16.1Nanu tathāgatassāpi āsavā khīṇā sāvakassāpi āsavā khīṇāti?
kv3.1:16.2Āmantā.
kv3.1:16.3Atthi kiñci nānākaraṇaṁ tathāgatassa vā sāvakassa vā āsavakkhayena vā āsavakkhayaṁ vimuttiyā vā vimuttīti?
kv3.1:16.4Natthi.
kv3.1:16.5Hañci natthi kiñci nānākaraṇaṁ tathāgatassa vā sāvakassa vā āsavakkhayena vā āsavakkhayaṁ vimuttiyā vā vimutti, tena vata re vattabbe—
kv3.1:16.6“āsavānaṁ khaye yathābhūtaṁ ñāṇaṁ tathāgatabalaṁ sāvakasādhāraṇan”ti.
kv3.1:17.1Āsavānaṁ khaye yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:17.2Āmantā.
kv3.1:17.3Ṭhānāṭhāne yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:17.4Na hevaṁ vattabbe …pe….
kv3.1:18.1Āsavānaṁ khaye yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:18.2Āmantā.
kv3.1:18.3Sattānaṁ cutūpapāte yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:18.4Na hevaṁ vattabbe …pe….
kv3.1:19.1Ṭhānāṭhāne yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:19.2Āmantā.
kv3.1:19.3Āsavānaṁ khaye yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:19.4Na hevaṁ vattabbe …pe….
kv3.1:20.1Sattānaṁ cutūpapāte yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:20.2Āmantā.
kv3.1:20.3Āsavānaṁ khaye yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:20.4Na hevaṁ vattabbe …pe….
kv3.1:21.1Indriyaparopariyattaṁ yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:21.2Āmantā.
kv3.1:21.3Ṭhānāṭhāne yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:21.4Na hevaṁ vattabbe …pe….
kv3.1:22.1Indriyaparopariyattaṁ yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:22.2Āmantā …pe….
kv3.1:22.3Āsavānaṁ khaye yathābhūtaṁ ñāṇaṁ tathāgatabalaṁ sāvakaasādhāraṇanti?
kv3.1:22.4Na hevaṁ vattabbe …pe….
kv3.1:23.1Ṭhānāṭhāne yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:23.2Āmantā.
kv3.1:23.3Indriyaparopariyattaṁ yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:23.4Na hevaṁ vattabbe …pe….
kv3.1:24.1Āsavānaṁ khaye yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:24.2Āmantā.
kv3.1:24.3Indriyaparopariyattaṁ yathābhūtaṁ ñāṇaṁ tathāgatabalaṁ sāvakasādhāraṇanti?
kv3.1:24.4Na hevaṁ vattabbe …pe….
kv3.1:24.5Balakathā niṭṭhitā.