kv4.1:0.1Kathāvatthu
kv4.1:0.2Mahāpaṇṇāsaka
kv4.1:0.3Catutthavagga
kv4.1:0.4Gihissaarahātikathā
kv4.1:1.1Gihi’ssa arahāti?
kv4.1:1.2Āmantā.
kv4.1:1.3Atthi arahato gihisaṁyojananti?
kv4.1:1.4Na hevaṁ vattabbe …pe…
kv4.1:1.5natthi arahato gihisaṁyojananti?
kv4.1:1.6Āmantā.
kv4.1:1.7Hañci natthi arahato gihisaṁyojanaṁ, no ca vata re vattabbe—
kv4.1:1.8“gihi’ssa arahā”ti.
kv4.1:2.1Gihi’ssa arahāti?
kv4.1:2.2Āmantā.
kv4.1:2.3Nanu arahato gihisaṁyojanaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammanti?
kv4.1:2.4Āmantā.
kv4.1:2.5Hañci arahato gihisaṁyojanaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, no ca vata re vattabbe—
kv4.1:2.6“gihi’ssa arahā”ti.
kv4.1:3.1Gihi’ssa arahāti?
kv4.1:3.2Āmantā.
kv4.1:3.3Atthi koci gihī gihisaṁyojanaṁ appahāya diṭṭheva dhamme dukkhassantakaroti?
kv4.1:3.4Natthi.
kv4.1:3.5Hañci natthi koci gihī gihisaṁyojanaṁ appahāya diṭṭheva dhamme dukkhassantakaro, no ca vata re vattabbe—
kv4.1:3.6“gihi’ssa arahā”ti.
kv4.1:4.1Gihi’ssa arahāti?
kv4.1:4.2Āmantā.
kv4.1:4.3Nanu vacchagotto paribbājako bhagavantaṁ etadavoca—
kv4.1:4.4“atthi nu kho, bho gotama, koci gihī gihisaṁyojanaṁ appahāya kāyassa bhedā dukkhassantakaro”ti?
kv4.1:4.5“Natthi kho, vaccha, koci gihī gihisaṁyojanaṁ appahāya kāyassa bhedā dukkhassantakaro”ti.
kv4.1:4.6Attheva suttantoti?
kv4.1:4.7Āmantā.
kv4.1:4.8Tena hi na vattabbaṁ—
kv4.1:4.9“gihi’ssa arahā”ti.
kv4.1:5.1Gihi’ssa arahāti?
kv4.1:5.2Āmantā.
kv4.1:5.3Arahā methunaṁ dhammaṁ paṭiseveyya, methunaṁ uppādeyya, puttasambādhasayanaṁ ajjhāvaseyya, kāsikacandanaṁ paccanubhaveyya, mālāgandhavilepanaṁ dhāreyya, jātarūparajataṁ sādiyeyya, ajeḷakaṁ paṭiggaṇheyya, kukkuṭasūkaraṁ paṭiggaṇheyya, hatthigavassavaḷavaṁ paṭiggaṇheyya, tittiravaṭṭakamorakapiñjaraṁ paṭiggaṇheyya, cittavaṇḍavālamoḷiṁ dhāreyya, odātāni vatthāni dīghadasāni dhāreyya, yāvajīvaṁ agāriyabhūto assāti?
kv4.1:5.4Na hevaṁ vattabbe …pe….
kv4.1:6.1Na vattabbaṁ—
kv4.1:6.2“gihi’ssa arahā”ti?
kv4.1:6.3Āmantā.
kv4.1:6.4Nanu yaso kulaputto, uttiyo gahapati, setu māṇavo, gihibyañjanena arahattaṁ pattoti?
kv4.1:6.5Āmantā.
kv4.1:6.6Hañci yaso kulaputto, uttiyo gahapati, setu māṇavo, gihibyañjanena arahattaṁ patto, tena vata re vattabbe—
kv4.1:6.7“gihi’ssa arahā”ti.
kv4.1:6.8Gihi’ssa arahātikathā niṭṭhitā.