kv4.4:0.1Kathāvatthu
kv4.4:0.2Mahāpaṇṇāsaka
kv4.4:0.3Catutthavagga
kv4.4:0.4Samannāgatakathā
kv4.4:1.1Arahā catūhi phalehi samannāgatoti?
kv4.4:1.2Āmantā.
kv4.4:1.3Arahā catūhi phassehi catūhi vedanāhi catūhi saññāhi catūhi cetanāhi catūhi cittehi catūhi saddhāhi catūhi vīriyehi catūhi satīhi catūhi samādhīhi catūhi paññāhi samannāgatoti?
kv4.4:1.4Na hevaṁ vattabbe …pe….
kv4.4:2.1Anāgāmī tīhi phalehi samannāgatoti?
kv4.4:2.2Āmantā.
kv4.4:2.3Anāgāmī tīhi phassehi …pe… tīhi paññāhi samannāgatoti?
kv4.4:2.4Na hevaṁ vattabbe …pe….
kv4.4:3.1Sakadāgāmī dvīhi phalehi samannāgatoti?
kv4.4:3.2Āmantā.
kv4.4:3.3Sakadāgāmī dvīhi phassehi …pe… dvīhi paññāhi samannāgatoti?
kv4.4:3.4Na hevaṁ vattabbe …pe….
kv4.4:4.1Arahā sotāpattiphalena samannāgatoti?
kv4.4:4.2Āmantā.
kv4.4:4.3Arahā sotāpanno sattakkhattuparamo, kolaṅkolo, ekabījīti?
kv4.4:4.4Na hevaṁ vattabbe …pe…
kv4.4:4.5arahā sakadāgāmiphalena samannāgatoti?
kv4.4:4.6Āmantā.
kv4.4:4.7Arahā sakadāgāmīti?
kv4.4:4.8Na hevaṁ vattabbe …pe…
kv4.4:4.9arahā anāgāmiphalena samannāgatoti?
kv4.4:4.10Āmantā.
kv4.4:4.11Arahā anāgāmī, antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsoto akaniṭṭhagāmīti?
kv4.4:4.12Na hevaṁ vattabbe …pe….
kv4.4:5.1Anāgāmī sotāpattiphalena samannāgatoti?
kv4.4:5.2Āmantā.
kv4.4:5.3Anāgāmī sotāpanno sattakkhattuparamo, kolaṅkolo, ekabījīti?
kv4.4:5.4Na hevaṁ vattabbe …pe…
kv4.4:5.5anāgāmī sakadāgāmiphalena samannāgatoti?
kv4.4:5.6Āmantā.
kv4.4:5.7Anāgāmī sakadāgāmīti?
kv4.4:5.8Na hevaṁ vattabbe …pe….
kv4.4:6.1Sakadāgāmī sotāpattiphalena samannāgatoti?
kv4.4:6.2Āmantā.
kv4.4:6.3Sakadāgāmī sotāpanno sattakkhattuparamo, kolaṅkolo, ekabījīti?
kv4.4:6.4Na hevaṁ vattabbe …pe….
kv4.4:7.1Sotāpattiphalena samannāgato “sotāpanno”ti vattabboti?
kv4.4:7.2Āmantā.
kv4.4:7.3Arahā sotāpattiphalena samannāgatoti?
kv4.4:7.4Āmantā.
kv4.4:7.5Sveva arahā, so sotāpannoti?
kv4.4:7.6Na hevaṁ vattabbe …pe….
kv4.4:8.1Sakadāgāmiphalena samannāgato “sakadāgāmī”ti vattabboti?
kv4.4:8.2Āmantā.
kv4.4:8.3Arahā sakadāgāmiphalena samannāgatoti?
kv4.4:8.4Āmantā.
kv4.4:8.5Sveva arahā, so sakadāgāmīti?
kv4.4:8.6Na hevaṁ vattabbe …pe….
kv4.4:9.1Anāgāmiphalena samannāgato “anāgāmī”ti vattabboti?
kv4.4:9.2Āmantā.
kv4.4:9.3Arahā anāgāmiphalena samannāgatoti?
kv4.4:9.4Āmantā.
kv4.4:9.5Sveva arahā, so anāgāmīti?
kv4.4:9.6Na hevaṁ vattabbe …pe….
kv4.4:10.1Sotāpattiphalena samannāgato “sotāpanno”ti vattabboti?
kv4.4:10.2Āmantā.
kv4.4:10.3Anāgāmī sotāpattiphalena samannāgatoti?
kv4.4:10.4Āmantā.
kv4.4:10.5Sveva anāgāmī, so sotāpannoti?
kv4.4:10.6Na hevaṁ vattabbe …pe….
kv4.4:11.1Sakadāgāmiphalena samannāgato “sakadāgāmī”ti vattabboti?
kv4.4:11.2Āmantā.
kv4.4:11.3Anāgāmī sakadāgāmiphalena samannāgatoti?
kv4.4:11.4Āmantā.
kv4.4:11.5Sveva anāgāmī, so sakadāgāmīti?
kv4.4:11.6Na hevaṁ vattabbe …pe….
kv4.4:12.1Sotāpattiphalena samannāgato “sotāpanno”ti vattabboti?
kv4.4:12.2Āmantā.
kv4.4:12.3Sakadāgāmī sotāpattiphalena samannāgatoti?
kv4.4:12.4Āmantā.
kv4.4:12.5Sveva sakadāgāmī, so sotāpannoti?
kv4.4:12.6Na hevaṁ vattabbe …pe….
kv4.4:13.1Arahā sotāpattiphalena samannāgatoti?
kv4.4:13.2Āmantā.
kv4.4:13.3Nanu arahā sotāpattiphalaṁ vītivattoti?
kv4.4:13.4Āmantā.
kv4.4:13.5Hañci arahā sotāpattiphalaṁ vītivatto, no ca vata re vattabbe—
kv4.4:13.6“arahā sotāpattiphalena samannāgato”ti.
kv4.4:14.1Arahā sotāpattiphalaṁ vītivatto tena samannāgatoti?
kv4.4:14.2Āmantā.
kv4.4:14.3Arahā sotāpattimaggaṁ vītivatto, sakkāyadiṭṭhiṁ vicikicchaṁ sīlabbataparāmāsaṁ, apāyagamanīyaṁ rāgaṁ, apāyagamanīyaṁ dosaṁ, apāyagamanīyaṁ mohaṁ vītivatto tena samannāgatoti?
kv4.4:14.4Na hevaṁ vattabbe …pe….
kv4.4:15.1Arahā sakadāgāmiphalena samannāgatoti?
kv4.4:15.2Āmantā.
kv4.4:15.3Nanu arahā sakadāgāmiphalaṁ vītivattoti?
kv4.4:15.4Āmantā.
kv4.4:15.5Hañci arahā sakadāgāmiphalaṁ vītivatto, no ca vata re vattabbe—
kv4.4:15.6“arahā sakadāgāmiphalena samannāgato”ti.
kv4.4:16.1Arahā sakadāgāmiphalaṁ vītivatto tena samannāgatoti?
kv4.4:16.2Āmantā.
kv4.4:16.3Arahā sakadāgāmimaggaṁ vītivatto, oḷārikaṁ kāmarāgaṁ, oḷārikaṁ byāpādaṁ vītivatto tena samannāgatoti?
kv4.4:16.4Na hevaṁ vattabbe …pe….
kv4.4:17.1Arahā anāgāmiphalena samannāgatoti?
kv4.4:17.2Āmantā.
kv4.4:17.3Nanu arahā anāgāmiphalaṁ vītivattoti?
kv4.4:17.4Āmantā.
kv4.4:17.5Hañci arahā anāgāmiphalaṁ vītivatto, no ca vata re vattabbe—
kv4.4:17.6“arahā anāgāmiphalena samannāgato”ti.
kv4.4:18.1Arahā anāgāmiphalaṁ vītivatto tena samannāgatoti?
kv4.4:18.2Āmantā.
kv4.4:18.3Arahā anāgāmimaggaṁ vītivatto, aṇusahagataṁ kāmarāgaṁ, aṇusahagataṁ byāpādaṁ vītivatto tena samannāgatoti?
kv4.4:18.4Na hevaṁ vattabbe …pe….
kv4.4:19.1Anāgāmī sotāpattiphalena samannāgatoti?
kv4.4:19.2Āmantā.
kv4.4:19.3Nanu anāgāmī sotāpattiphalaṁ vītivattoti?
kv4.4:19.4Āmantā.
kv4.4:19.5Hañci anāgāmī sotāpattiphalaṁ vītivatto, no ca vata re vattabbe—
kv4.4:19.6“anāgāmī sotāpattiphalena samannāgato”ti.
kv4.4:20.1Anāgāmī sotāpattiphalaṁ vītivatto tena samannāgatoti?
kv4.4:20.2Āmantā.
kv4.4:20.3Anāgāmī sotāpattimaggaṁ vītivatto, sakkāyadiṭṭhiṁ …pe… apāyagamanīyaṁ mohaṁ vītivatto tena samannāgatoti?
kv4.4:20.4Na hevaṁ vattabbe …pe….
kv4.4:21.1Anāgāmī sakadāgāmiphalena samannāgatoti?
kv4.4:21.2Āmantā.
kv4.4:21.3Nanu anāgāmī sakadāgāmiphalaṁ vītivattoti?
kv4.4:21.4Āmantā.
kv4.4:21.5Hañci anāgāmī sakadāgāmiphalaṁ vītivatto, no ca vata re vattabbe—
kv4.4:21.6“anāgāmī sakadāgāmiphalena samannāgato”ti.
kv4.4:22.1Anāgāmī sakadāgāmiphalaṁ vītivatto tena samannāgatoti?
kv4.4:22.2Āmantā.
kv4.4:22.3Anāgāmī sakadāgāmimaggaṁ vītivatto, oḷārikaṁ kāmarāgaṁ, oḷārikaṁ byāpādaṁ vītivatto tena samannāgatoti?
kv4.4:22.4Na hevaṁ vattabbe …pe….
kv4.4:23.1Sakadāgāmī sotāpattiphalena samannāgatoti?
kv4.4:23.2Āmantā.
kv4.4:23.3Nanu sakadāgāmī sotāpattiphalaṁ vītivattoti?
kv4.4:23.4Āmantā.
kv4.4:23.5Hañci sakadāgāmī sotāpattiphalaṁ vītivatto, no ca vata re vattabbe—
kv4.4:23.6“sakadāgāmī sotāpattiphalena samannāgato”ti.
kv4.4:24.1Sakadāgāmī sotāpattiphalaṁ vītivatto tena samannāgatoti?
kv4.4:24.2Āmantā.
kv4.4:24.3Sakadāgāmī sotāpattimaggaṁ vītivatto, sakkāyadiṭṭhiṁ …pe… apāyagamanīyaṁ mohaṁ vītivatto tena samannāgatoti?
kv4.4:24.4Na hevaṁ vattabbe …pe….
kv4.4:25.1Na vattabbaṁ—
kv4.4:25.2“arahā catūhi phalehi samannāgato”ti?
kv4.4:25.3Āmantā.
kv4.4:25.4Nanu arahatā cattāri phalāni paṭiladdhāni tehi ca aparihīnoti?
kv4.4:25.5Āmantā.
kv4.4:25.6Hañci arahatā cattāri phalāni paṭiladdhāni tehi ca aparihīno, tena vata re vattabbe—
kv4.4:25.7“arahā catūhi phalehi samannāgato”ti.
kv4.4:26.1Na vattabbaṁ—
kv4.4:26.2“anāgāmī tīhi phalehi samannāgato”ti?
kv4.4:26.3Āmantā.
kv4.4:26.4Nanu anāgāminā tīṇi phalāni paṭiladdhāni tehi ca aparihīnoti?
kv4.4:26.5Āmantā.
kv4.4:26.6Hañci anāgāminā tīṇi phalāni paṭiladdhāni tehi ca aparihīno, tena vata re vattabbe—
kv4.4:26.7“anāgāmī tīhi phalehi samannāgato”ti.
kv4.4:27.1Na vattabbaṁ—
kv4.4:27.2“sakadāgāmī dvīhi phalehi samannāgato”ti?
kv4.4:27.3Āmantā.
kv4.4:27.4Nanu sakadāgāminā dve phalāni paṭiladdhāni tehi ca aparihīnoti?
kv4.4:27.5Āmantā.
kv4.4:27.6Hañci sakadāgāminā dve phalāni paṭiladdhāni tehi ca aparihīno, tena vata re vattabbe—
kv4.4:27.7“sakadāgāmī dvīhi phalehi samannāgato”ti.
kv4.4:28.1Arahatā cattāri phalāni paṭiladdhāni tehi ca aparihīnoti, arahā catūhi phalehi samannāgatoti?
kv4.4:28.2Āmantā.
kv4.4:28.3Arahatā cattāro maggā paṭiladdhā tehi ca aparihīnoti, arahā catūhi maggehi samannāgatoti?
kv4.4:28.4Na hevaṁ vattabbe …pe….
kv4.4:29.1Anāgāminā tīṇi phalāni paṭiladdhāni tehi ca aparihīnoti, anāgāmī tīhi phalehi samannāgatoti?
kv4.4:29.2Āmantā.
kv4.4:29.3Anāgāminā tayo maggā paṭiladdhā tehi ca aparihīnoti, anāgāmī tīhi maggehi samannāgatoti?
kv4.4:29.4Na hevaṁ vattabbe …pe….
kv4.4:30.1Sakadāgāminā dve phalāni paṭiladdhāni tehi ca aparihīnoti, sakadāgāmī dvīhi phalehi samannāgatoti?
kv4.4:30.2Āmantā.
kv4.4:30.3Sakadāgāminā dve maggā paṭiladdhā tehi ca aparihīnoti, sakadāgāmī dvīhi maggehi samannāgatoti?
kv4.4:30.4Na hevaṁ vattabbe …pe….
kv4.4:30.5Samannāgatakathā niṭṭhitā.