kv2.8:0.1Kathāvatthu
kv2.8:0.2Mahāpaṇṇāsaka
kv2.8:0.3Dutiyavagga
kv2.8:0.4Kukkuḷakathā
kv2.8:1.1Sabbe saṅkhārā anodhiṁ katvā kukkuḷāti?
kv2.8:1.2Āmantā.
kv2.8:1.3Nanu atthi sukhā vedanā, kāyikaṁ sukhaṁ, cetasikaṁ sukhaṁ, dibbaṁ sukhaṁ, mānusakaṁ sukhaṁ, lābhasukhaṁ, sakkārasukhaṁ, yānasukhaṁ, sayanasukhaṁ, issariyasukhaṁ, ādhipaccasukhaṁ, gihisukhaṁ, sāmaññasukhaṁ, sāsavaṁ sukhaṁ, anāsavaṁ sukhaṁ, upadhisukhaṁ, nirūpadhisukhaṁ, sāmisaṁ sukhaṁ, nirāmisaṁ sukhaṁ, sappītikaṁ sukhaṁ, nippītikaṁ sukhaṁ, jhānasukhaṁ, vimuttisukhaṁ, kāmasukhaṁ, nekkhammasukhaṁ, vivekasukhaṁ, upasamasukhaṁ, sambodhasukhanti?
kv2.8:1.4Āmantā.
kv2.8:1.5Hañci atthi sukhā vedanā …pe…
kv2.8:1.6sambodhasukhaṁ, no ca vata re vattabbe—
kv2.8:1.7“sabbe saṅkhārā anodhiṁ katvā kukkuḷā”ti.
kv2.8:2.1Sabbe saṅkhārā anodhiṁ katvā kukkuḷāti?
kv2.8:2.2Āmantā.
kv2.8:2.3Sabbe saṅkhārā dukkhā vedanā kāyikaṁ dukkhaṁ cetasikaṁ dukkhaṁ sokaparidevadukkhadomanassaupāyāsāti?
kv2.8:2.4Na hevaṁ vattabbe.
kv2.8:3.1Na vattabbaṁ—
kv2.8:3.2“sabbe saṅkhārā anodhiṁ katvā kukkuḷā”ti?
kv2.8:3.3Āmantā.
kv2.8:3.4Nanu vuttaṁ bhagavatā—
kv2.8:3.5“sabbaṁ, bhikkhave, ādittaṁ.
kv2.8:3.6Kiñca, bhikkhave, sabbaṁ ādittaṁ?
kv2.8:3.7Cakkhuṁ, bhikkhave, ādittaṁ, rūpā ādittā, cakkhuviññāṇaṁ ādittaṁ, cakkhusamphasso āditto;
kv2.8:3.8yamidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi ādittaṁ.
kv2.8:3.9Kena ādittaṁ?
kv2.8:3.10‘Rāgagginā dosagginā mohagginā ādittaṁ, jātiyā jarāya maraṇena sokehi paridevehi dukkhehi domanassehi upāyāsehi ādittan’ti vadāmi.
kv2.8:3.11Sotaṁ ādittaṁ, saddā ādittā …pe…
kv2.8:3.12ghānaṁ ādittaṁ, gandhā ādittā …pe…
kv2.8:3.13jivhā ādittā, rasā ādittā …pe…
kv2.8:3.14kāyo āditto, phoṭṭhabbā ādittā …pe…
kv2.8:3.15mano āditto, dhammā ādittā, manoviññāṇaṁ ādittaṁ, manosamphasso āditto;
kv2.8:3.16yamidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi ādittaṁ.
kv2.8:3.17Kena ādittaṁ?
kv2.8:3.18‘Rāgagginā dosagginā mohagginā ādittaṁ, jātiyā jarāya maraṇena sokehi paridevehi dukkhehi domanassehi upāyāsehi ādittan’ti vadāmī”ti.
kv2.8:3.19Attheva suttantoti?
kv2.8:3.20Āmantā.
kv2.8:3.21Tena hi vattabbaṁ—
kv2.8:3.22“sabbe saṅkhārā anodhiṁ katvā kukkuḷā”ti.
kv2.8:4.1Sabbe saṅkhārā anodhiṁ katvā kukkuḷāti?
kv2.8:4.2Āmantā.
kv2.8:4.3Nanu vuttaṁ bhagavatā—
kv2.8:4.4“pañcime, bhikkhave, kāmaguṇā.
kv2.8:4.5Katame pañca?
kv2.8:4.6Cakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā, sotaviññeyyā saddā …pe…
kv2.8:4.7ghānaviññeyyā gandhā …
kv2.8:4.8jivhāviññeyyā rasā …
kv2.8:4.9kāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.
kv2.8:4.10Ime kho, bhikkhave, pañca kāmaguṇā”ti.
kv2.8:4.11Attheva suttantoti?
kv2.8:4.12Āmantā.
kv2.8:4.13Tena hi na vattabbaṁ—
kv2.8:4.14“sabbe saṅkhārā anodhiṁ katvā kukkuḷā”ti.
kv2.8:5.1Na vattabbaṁ—
kv2.8:5.2“sabbe saṅkhārā anodhiṁ katvā kukkuḷā”ti?
kv2.8:5.3Āmantā.
kv2.8:5.4Nanu vuttaṁ bhagavatā—
kv2.8:5.5“lābhā vo, bhikkhave, suladdhaṁ vo, bhikkhave, khaṇo vo paṭiladdho brahmacariyavāsāya.
kv2.8:5.6Diṭṭhā mayā, bhikkhave, cha phassāyatanikā nāma nirayā.
kv2.8:5.7Tattha yaṁ kiñci cakkhunā rūpaṁ passati, aniṭṭharūpaññeva passati no iṭṭharūpaṁ, akantarūpaññeva passati no kantarūpaṁ, amanāparūpaññeva passati no manāparūpaṁ.
kv2.8:5.8Yaṁ kiñci sotena saddaṁ suṇāti …pe…
kv2.8:5.9ghānena gandhaṁ ghāyati …
kv2.8:5.10jivhāya rasaṁ sāyati …
kv2.8:5.11kāyena phoṭṭhabbaṁ phusati …
kv2.8:5.12manasā dhammaṁ vijānāti, aniṭṭharūpaññeva vijānāti no iṭṭharūpaṁ, akantarūpaññeva vijānāti no kantarūpaṁ, amanāparūpaññeva vijānāti no manāparūpan”ti.
kv2.8:5.13Attheva suttantoti?
kv2.8:5.14Āmantā.
kv2.8:5.15Tena hi vattabbaṁ—
kv2.8:5.16“sabbe saṅkhārā anodhiṁ katvā kukkuḷā”ti.
kv2.8:6.1Sabbe saṅkhārā anodhiṁ katvā kukkuḷāti?
kv2.8:6.2Āmantā.
kv2.8:6.3Nanu vuttaṁ bhagavatā—
kv2.8:6.4“lābhā vo, bhikkhave, suladdhaṁ vo, bhikkhave, khaṇo vo paṭiladdho brahmacariyavāsāya.
kv2.8:6.5Diṭṭhā mayā, bhikkhave, cha phassāyatanikā nāma saggā.
kv2.8:6.6Tattha yaṁ kiñci cakkhunā rūpaṁ passati, iṭṭharūpaññeva passati no aniṭṭharūpaṁ, kantarūpaññeva passati no akantarūpaṁ, manāparūpaññeva passati no amanāparūpaṁ.
kv2.8:6.7Yaṁ kiñci sotena saddaṁ suṇāti …pe…
kv2.8:6.8ghānena gandhaṁ ghāyati …
kv2.8:6.9jivhāya rasaṁ sāyati …
kv2.8:6.10kāyena phoṭṭhabbaṁ phusati …
kv2.8:6.11manasā dhammaṁ vijānāti, iṭṭharūpaññeva vijānāti no aniṭṭharūpaṁ, kantarūpaññeva vijānāti no akantarūpaṁ, manāparūpaññeva vijānāti no amanāparūpan”ti.
kv2.8:6.12Attheva suttantoti?
kv2.8:6.13Āmantā.
kv2.8:6.14Tena hi na vattabbaṁ—
kv2.8:6.15“sabbe saṅkhārā anodhiṁ katvā kukkuḷā”ti.
kv2.8:7.1Na vattabbaṁ—
kv2.8:7.2“sabbe saṅkhārā anodhiṁ katvā kukkuḷā”ti?
kv2.8:7.3Āmantā.
kv2.8:7.4Nanu “yadaniccaṁ taṁ dukkhaṁ”, vuttaṁ bhagavatā—
kv2.8:7.5“sabbe saṅkhārā aniccā”ti?
kv2.8:7.6Āmantā.
kv2.8:7.7Hañci “yadaniccaṁ taṁ dukkhaṁ”, vuttaṁ bhagavatā—
kv2.8:7.8“sabbe saṅkhārā aniccā”, tena vata re vattabbe—
kv2.8:7.9“sabbe saṅkhārā anodhiṁ katvā kukkuḷā”ti.
kv2.8:8.1Sabbe saṅkhārā anodhiṁ katvā kukkuḷāti?
kv2.8:8.2Āmantā.
kv2.8:8.3Dānaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti?
kv2.8:8.4Na hevaṁ vattabbe.
kv2.8:9.1Sīlaṁ …pe…
kv2.8:9.2uposatho …pe…
kv2.8:9.3bhāvanā …pe…
kv2.8:9.4brahmacariyaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti?
kv2.8:9.5Na hevaṁ vattabbe.
kv2.8:10.1Nanu dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?
kv2.8:10.2Āmantā.
kv2.8:10.3Hañci dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākaṁ, no ca vata re vattabbe—
kv2.8:10.4“sabbe saṅkhārā anodhiṁ katvā kukkuḷā”ti.
kv2.8:11.1Nanu sīlaṁ …
kv2.8:11.2uposatho …
kv2.8:11.3bhāvanā …
kv2.8:11.4brahmacariyaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?
kv2.8:11.5Āmantā.
kv2.8:11.6Hañci brahmacariyaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti, no ca vata re vattabbe—
kv2.8:11.7“sabbe saṅkhārā anodhiṁ katvā kukkuḷā”ti.
kv2.8:12.1Sabbe saṅkhārā anodhiṁ katvā kukkuḷāti?
kv2.8:12.2Āmantā.
kv2.8:12.3Nanu vuttaṁ bhagavatā—
kv2.8:13.1“Sukho viveko tuṭṭhassa,
kv2.8:13.2sutadhammassa passato;
kv2.8:13.3Abyāpajjaṁ sukhaṁ loke,
kv2.8:13.4pāṇabhūtesu saṁyamo.
kv2.8:14.1Sukhā virāgatā loke,
kv2.8:14.2kāmānaṁ samatikkamo;
kv2.8:14.3Asmimānassa yo vinayo,
kv2.8:14.4etaṁ ve paramaṁ sukhaṁ.
kv2.8:15.1Taṁ sukhena sukhaṁ pattaṁ,
kv2.8:15.2accantasukhameva taṁ;
kv2.8:15.3Tisso vijjā anuppattā,
kv2.8:15.4etaṁ ve paramaṁ sukhan”ti.
kv2.8:16.1Attheva suttantoti?
kv2.8:16.2Āmantā.
kv2.8:16.3Tena hi na vattabbaṁ—
kv2.8:16.4“sabbe saṅkhārā anodhiṁ katvā kukkuḷā”ti.
kv2.8:16.5Kukkuḷakathā niṭṭhitā.